"Re-coñecendo Portugal: Guimaraes"

Nesta ocasión visitei Guimaraes, no Distrito de Braga. Turistas de todo o país visitan o Castelo de Guimaraes e o Paço dos Duques de Bragança, mais a parte antiga da cidade é tamén unha pequena xoia, coma moitas que ten o país, de norte a sur.

No centro as rúas son estreitas e destacan os cuartos construídos sobre pasarelas que unen as casas dun lado e do outro da rúa.

A praza principal é fermosísima e un presente o bulicio da xente nas terrazas de primavera e verán, agora recollidas por causa do vento e a chuvia.

O Paço dos Duques de Bragança é un exemplo único polo seu estilo en toda a Península Ibérica. Trátase dun palacio construído no S. XV por D. Afonso, futuro duque de Bragança. Nel está presente a influencia arquitectónica europea da época, que lembra a edificios semellantes en Franza ou Alemaña. No salón principal do palacio (é visitable) destaca o elevadísimo teito construído en madeira de castaño posta de maneira tal que lembra ao casco dun barco invertido. Daí a súa altura. É unha homenaxe á época dos Descubrimentos portugueses.

Nos muros do Castelo de Guimaraes atópase esta placa, que homenaxea á cultura común galaico-portuguesa. Unha inesperado pero feliz achado, que entra, dalgunha maneira, en contradición co que foi o papel do inquilino principal do castelo, D. Henrique de Borgonha, como veredes agora.

As pedras do castelo encerran unha parte moi importante da historia de Portugal: a da súa propia formación. Foi edificado no século X e ocupado por Don Henrique de Borgonha, que veu desde esa rexión francesa para contribuír ao proceso de "reconquista" aos mouros, e que axudou ao rei Alfonso VI de Leon e Castela a conquistar o Reino da Galiza, que constituía por entón a moderna Galiza e o norte de Portugal. O rei Alfonso criou así un "estado tapón", o Condado Portucalense (territorio ata o momento dependente do Reino da Galiza) que evitaría que o poder galego avanzase polo territorio portugués e puidese restarlle poder.

D. Henrique de Borgonha, anque nunca ocupou o título de rei, é tratado como D. Henrique I de Portugal por algúns historiadores, que o consideran o primeiro rei portugués.

Sobre o castelo de Guimaraes, o certo é que se trata dun lugar para visitar moitas veces, e en todas a sensación é distinta. É un castelo en ruínas, sen teito, así que o día escollido para visitalo farao distinto cada vez. Esta vez estaba cheo de auga apozada en todos os recunchos das rochas, en todos os buraquiños da pedra.

En resumo, unha visita a Guimaraes fará que concordedes comigo en que Portugal é un país único pola beleza dos seus pobos.